支持本土創意 (香港經濟日報 2013-09-27)

為 SMF 擔任大使的 Joey Tang，笑言年輕時夾 band，沒有今日這類多元化音樂活動。「那時最流行到堅道明愛表演，是樂隊溫床，而高山劇場是要有一定名氣才去到的。去年為 SMF 演出，氣氛很好，幾位主辦者不是純為金錢，而希望做有意義的事，像看到昔日的自己。」

4 人樂隊 Supper Moment 去過台灣「春吶」演出，覺得香港的銀礦灣絕不遜色。「這個平台沒有分主流地下，大家可在同一個地方，唱出自己的聲音。而且它亦漸漸建立了地方特色，很能代表香港音樂文化。」

4 子指隨着 Clockenflap、春浪、龍舟音樂節等陸續出現，可帶來良性競爭。「最重要不是為跟風，而是以音樂理念先行，其餘的就當是 bonus，跟組樂隊的理念其實是相似的。」

然而他們覺得大型音樂節屬於文化活動的最頂層，底下仍需要有許多支持。「例如香港仍缺乏可借作長期表演的 live house，樂隊沒有固定演出，就少了經驗的累積。對比內地，深圳也有了文化村，可容納藝廊、音樂場地等，這樣無論觀眾和音樂人，才有看戶外演出的習慣。」

Supper Moment 〈很久沒擁抱〉 最後一擊 (新Monday 2013-09-06)

暑假完結，學生亦回到校園，由NM+/《新Monday》同本地4支樂隊：KOLOR、KillerSoap、Supper Moment同Yellow!合作嘅「敢作敢拍」暑期作業計劃，亦差唔多去到完結階段。最後出場負責Supper Moment MV嘅呢班就讀多媒體高級文憑學生（現於HKDI/IVE（LWL）就讀），本來團隊得3個人，開始時都擔心佢哋搵唔搵到幫手，但由於聽到係幫Supper Moment拍MV，結果一呼百應。另外喺拍攝前1日仍落住雨，但正式開拍時卻陽光普照，順利完成，為今次計劃畫上完美句號。4個MV已進入後期製作階段，經埋各樂隊最後審批，就會喺《新Monday》fb首播，記住到時要支持各同學同本地band嘅心血結晶。俾多啲like。

敢作敢拍 暑期習作計劃 (節錄) (新Monday 2013-08-02)

本地樂隊嘅聲勢愈嚟愈大，愈嚟愈多人支持本地原創音樂，所以今年我哋NM+/《新Monday》構思咗1個暑期習作計劃——「敢作敢拍」。我哋一直覺得band sound不單係個名詞，更代表住流行文化，而流行文化嘅擁有者，正係社會嘅新一代。

「敢作敢拍」計劃嘅理念好簡單，由NM+統籌，分別搵嚟4隊本地樂隊——KillerSoap、KOLOR、Supper Moment同Yellow！，每隊提供1首作品，交由香港知專設計學院（HKDI）嘅學生負責製作MV，由度橋、準備、拍攝到後期製作一手包辦，希望借此令學生吸收拍攝經驗嘅同時， 新一代嘅思維可以同時激發樂隊創意。

多謝4隊樂隊嘅參與，「敢作」出嘗試接受新事物；多謝HKDI學生嘅參與，「敢拍」出自己夢想。

Sammy不設防 盧巧音隨時大肚 (東方日報 2013-06-24)

樂隊Kolor前晚出席活動，主音蘇浩才（Sammy）自爆早在2010年的平安夜已向盧巧音成功求婚，不過因雙方各有工作在身，至兩個月前才秘密註冊結婚。他透露雙方家長已食飯慶祝，並揚言不會擺酒：「擺酒會令人很躁，心情會差，朋友會遲啲開party慶祝。」問可會展開「造人」大計？他說：「隨緣，大家都有共識。（不設防？）唔使防啦，就算防都係防菌！」

同場的樂隊Supper Moment則三缺一到場，他們稱：「鼓手為個騷練氣跑步，結果本末倒置，跑到腳都斷埋，我哋都有責備佢拖慢成隊進度。」

家駒 在你離開的20年後…… (節錄) (Milk 2013-06-20)

我們都很掛念你！

1.你對家駒哪首歌印象最深？這首歌給你什麼啟發？

2.你對家駒有什麼印象或感覺？

3.如果能給家駒SEND MESSAGE，你會向他說或問什麼？

SUPPER MOMENT

1. 坦白說，我們沒有聽過家駒的所有作品，聽過的都是比較廣為人知的幾首，〈海闊天空〉的影響力根本毋容置疑，亦不用我們介紹。反而〈AMANI〉一曲絕對是我們香港樂隊應該學習的！在那個年代香港經濟好、生活好，音樂主流題材真的鮮有如此的世界目光！

2. 聽過很多前輩說家駒有個外號，就是「黃伯」。可能想法多，有主見的人都是健談的，剛巧我們都有一個長氣主音，經常都會在表演時「演說」一番。

3. 「如果有一天見到家駒，除了要試試跟他鬥長氣外，真的要真心同佢講句：『你除咗長氣，真係好高音！』」

黃家駒不死20年 (節錄) (新Monday 2013-06-07)

Supper Moment@樂隊 

堅持信念一班80後年輕人，雖然佢哋成長嘅階段並唔係Beyond最光輝嘅時候，但Beyond對音樂堅持嘅態度同世界觀，都影響佢哋。

1. 點解會鍾意Beyond？

達：「我鍾意Beyond係佢哋3人時候，反而家駒嗰時就好少聽，嗰時覺得夾Beyond嘅歌好老土，夾外國band先有型，後來到自己開始寫歌，發覺（Beyond）有幾首歌對自己都意義甚大，而呢啲歌係需要時間去沉澱。」

雞：「我就同阿達相反，好細個就聽Beyond，記得嗰時表哥借咗隻《樂與怒》俾我聽，當時覺得佢哋同一般流行曲好唔同，後來到大學年代，開始學結他，第1首學Beyond嘅歌就係〈再見理想〉，因為最易係佢，哈哈！」

2. 最鍾意Beyond邊首歌？

達：「我哋4個一定揀〈海闊天空〉，對於有夢想嘅人都好有啟發。」

3. 對家駒印象最深刻係咩？

Sunny：「我諗係世界觀，始終嗰時香港少用廣東話去寫咁多世界、社會嘅問題，而Beyond嘅音樂就成功做到呢樣嘢。」

雞：「96年嗰時，佢哋出咗張live album《Live & Basic》，我聽完後發覺，live感染力永遠好過普通碟，自此，我就奠定咗以後live都要比碟更加精采。」

4. 家駒對你有咩影響？

雞：「喺大學嗰段喪彈Beyond歌嘅日子，從中都學咗好多樂理上嘅嘢。」

達：「人大咗，睇佢哋嗰份堅持多咗，先唔好理而家佢哋點不和，但其實各自仍然繼續去做，尤其Paul（黃貫中），大家都望到佢份堅持，呢樣係玩音樂最重要嘅元素。」

5. 有咩說話想同家駒講？

雞：「我哋4個成日諗，如果而家家駒重在生，好想知道佢會寫咩歌，因為Beyond嘅音樂喺以前都係帶領潮流，所以想知道若佢重在生，又會否咁做？家駒，你會寫咩歌？」

text - 娛樂組 design - Roy

The new genernation of video game PS4 is coming to town ! (節錄) (東Touch 2013-03-05)

Supper Moment樂隊 「我哋4個都有一齊打機，都係射擊game多啦，所以同隊友溝通係好重要，知道新手掣有mic可以講嘢，感覺好窩心，同埋個雲端處理幾方便，隨時upload新game，一返到屋企就有得玩，希望新PSN介面同功能可以user-friendly啲啦，而家嗰個要成日撳來撳去，至於個外形係點都唔係好care㗎喇，出得快過對家就最好。」

Live Band煮潮菜 糖衣粉芋 (爽報 2013-03-04)

以一曲《最後晚餐》為人熟悉的樂隊Supper Moment不但入得Band房也出得廳堂！尤其鼓手阿達，身為潮州人且煮得一手好潮州菜。今次他當「煮」家男下廚，隊友在旁彈結他唱歌打氣，在一片熱鬧氣氛中，示範了兩個潮州名菜「反沙芋」和「普寧豆醬雞」，讓大家過一個愉快Cooking Moment！

記者：周藍

攝影：楊錦文

叱咤樂壇頒獎禮人人土炮第二回 (節錄) (東Touch 2012-12-04)

一年一度，本地樂迷最期待睇嘅《叱咤樂壇流行榜頒獎禮》就快舉行，每次大家都好想知佢哋會玩咩主題，今年903就揀咗用「土炮起來！」作為口號，呼籲各位關注香港特色創作，所以記者會上每一位歌星都以非常local及懷舊嘅造型出場，《東TOUCH》將會訪問不同artist，睇下佢哋心目中到底何謂「土炮」！

text//iris、德欣 photo//Pang art//kenken

《小伙子出城記》碟評 (新Monday 2012-11-30)

8.8

《小伙子出城記》 Supper Moment

感性之言

有別於一般吶喊抗爭嘅indie bands，Supper 4子揀咗行溫情路線，講述與伴侶同度半生嘅成名作〈最後晚餐〉，歌詞細膩得令人流淚。記得上次訪問時，佢哋講到呢張專輯將會更成熟、感性。

果然，主打歌〈小伙子〉又再令筆者滿腔熱淚，尤其諗起主音Sunny喺一次音樂會上講嘅說話，配上歌詞「現實裏裝英勇難避免，成為了不懂哭也不想笑的一個漢子」，每個人細個所盼望嘅理想，長大後卻不知不覺被現實吞噬，亦只有堅持才會成功。國語歌〈過後〉編曲上較為特別，尤其中段嘅music break，令我諗起走Math-rock嘅日本樂隊TOE。〈飛〉延續眾人嘅熱血，旋律好有〈點滴〉感覺，非常正面。

筆者一直欣賞佢哋用音樂向樂迷灌輸正確觀念，要知道時下年輕人幾咁容易受藝人影響，正能量幾時都需要。（Joel）

推介歌：〈小伙子〉（評分以 10 為滿分）