銀礦灣沙灘音樂節2013 迎浪Chill out (新Monday 2013-10-2x)

迎海風聽音樂，並唔係台灣獨有專利，人哋有墾丁，香港亦有梅窩，舉行咗8年嘅「銀礦灣沙灘音樂節2013」（Silvermine Bay Music Festival，SMF），近年已經成為音樂文化界年度盛事，今年更有超過40支本地同海外樂隊參加，觀眾人數增至2萬5千人。

經過一連3日嘅音樂節，發現香港人都唔係只識行街shopping，觀眾群裏有老有少、有本地音樂支持者，亦有喜愛非洲音樂嘅朋友，原來香港都有可愛一面。

不過喺開幕禮當日（12/10），有出席嘅政府官員話，未來港珠澳大橋開通，政府要積極發揮大嶼山旅遊業嘅潛力。筆者聽完真心嬲，大嶼山明明係個遠離煩囂嘅好去處，又發展？想變做另1條廣東道？

滿場驚喜

3日有超過40隊bands，筆者落筆嗰時都好難決定，因為太多樂隊想介紹，重點歌手如Chochukmo、盧凱彤等，當然保持固有嘅水準與號召力，但原來有啲樂隊雖然唔算多人識，但表現卻令你眼前一亮，如第3日出場嘅Matchbox與Blaster，前者3月時出過專輯《Sunrise》，風格以acoustics及unplugged為主，而後者曲風則非常Funky，例如〈N車〉，筆者就非常喜愛主音把聲，唔好再話香港冇音樂，只得K歌。

SMF用心製作

「沒有最好的音響、沒有華麗的燈光、沒有精美的舞台，一切都從最簡單開始。」銀礦灣沙灘音樂節fb上一篇網誌，寫出佢哋音樂會嘅理念。

06年一班梅窩人決定搞1個屬於自己嘅音樂會，於是Silvermine Boy Music Festival（SMF）開始成形。咁多年嚟佢哋遇過好多困難，如資金問題、政府唔批場地、冇人睇等等，但一份對音樂嘅堅持，令每年入場人數不斷增加，今年更有2萬5千人參與，破歷年紀錄。出年再見。

氣氛讚絕

第2晚嘅壓軸表演實在太感動，當Supper Moment 4子踏上舞台準備set up時，台下嘅呼叫聲已絡繹不絕：「阿雞」、「CK」，全場近萬人目光就落喺4子身上，佢哋率先唱出〈點滴〉，以汗水同熱情牽動全場樂迷，隨住主音Sunny大叫：「一齊舉高雙手！」全場萬對手高舉向天空，氣氛一流。

其後，Supper Moment唱出〈機械人〉呢首講佢哋對搖滾堅持嘅歌，雖已係電台嘅熱播歌，但首次聽live，CK嘅bass slapping、阿雞結他solo同Sunny鐵樹蘭般式嘅唱腔都係非常震撼，我可以講剩係現場聽呢首歌加埋海灘嘅環境，已經值回入梅窩嗰廿幾蚊船錢。

text - Joel photo - Kenny、Yin design - YUI