陳奕迅十年霸、容祖兒九年霸，當一個頒獎典禮兩大獎項都冇得爭，難怪連觀眾都見悶，你估十年都例牌上幾次台囊括所有大獎嘅Eason又係咩感受，又難怪佢失準hea爆難捉摸嘅！
踢走Mr.、Dear Jane，成為年度唯一攞《叱咤》獎嘅本地樂隊、出道四年嘅組合銀獎得主Supper Moment都話唔怪得Eason：「點解台下可以鴉雀無聲？」
第四年去《叱咤》，上年都冇獎，以為今年都係坐成晚，仲要係當晚唯一一隊有獎攞嘅樂隊。做音樂嘅好多人都會將目標set做頒獎禮，我哋唔係孤芳自賞、唔係嗰種唔使你哋俗世肯定，呢個bonus對我哋有一定意義。但係一個獎，代表舊年我哋有一首歌成績唔錯啫，我唔明點解咁多人同我哋講：「喂！香港樂隊巔峰就係咁喇！以後香港樂壇band壇靠晒你哋喇！」
樂壇唔係一個地方、一間屋，我哋今年有一首歌唔錯啫，一隊樂隊憑咩撐得起成個樂壇呢？今年真係有啲欷歔，唔係自己攞獎，反而係陳奕迅上台時，點解台下可以鴉雀無聲？
陳奕迅攞獎冇問題、陳奕迅攞咗十年獎都冇問題、平心而論個獎的確係要畀佢……問題係，香港頒獎禮變得公式化，呢個獎係唔係良性競爭產生呢？重點唔係陳奕迅有問題，係大家有問題，香港人好鍾意將對樂壇寄望擺晒喺陳奕迅身上，唔通淨係陳奕迅一個搵到錢，搵完分啲畀大家咩？
樂壇變成咁、頒獎禮變得公式化，係唔係就要接受「係咁o架喇」呢？好多人對於band、對於搖滾，都淨係識得嗌口號、做手勢，有啲連個手勢都做錯添！學似《掃毒》嘅劉青雲話齋：「你可以嬲，但係唔好怨！」我哋都嬲，但係有做嘢。音樂係文化，媒體需要推廣文化，聽眾都需要渴求文化，唔信你去google吓，香港有好多樂隊、香港有好多live house需要觀眾、香港都有已經做咗十年嘅沙灘音樂節，呢個世界其實好大o架！鬧，不如放下偏見，試吓去聽啦！
沒有留言:
張貼留言