近期一齣比較有點意思的劇集《天與地》，當中談及搖滾精神及人生哲理，成為不少人茶餘飯後的話題，同時也掀起了大眾對本地樂隊的興趣與關注。其實，近年本地樂隊熱潮崛起，搖滾音樂已由地下一步一步邁向主流化，不少蟄伏多時的實力派indie band紛紛冒出頭來，讓大家可以接觸更多不同類別與形態的音樂，同時也牽引着新一代的年輕樂隊。對不少年輕人而言，組band是一件有型至極的事，但要達至有fans支持，甚至是開音樂會廣為人知，則要持之以恆地練習音樂、創作音樂及熱愛音樂，更要有獨立思考，透過音樂把自己的理念傳達別人，這是一種態度，也是搖滾的精神。站在台上的樂隊，受盡台下的萬千寵愛，然而他們背後的刻苦與一路拾級而上的辛酸，台下的我們又知道多少？今期我們專誠為大家找來本地搖滾樂教父級人馬為大家現身說法，同時也由現時炙手可熱的樂隊教授大家如何選擇樂器及夾band勝地，對搖滾有興趣的話，請聽着搖滾樂一起看畢我們整個特集，感受本地的搖滾精神。
text//資訊組 photo//Photo Team, Lam Cheung Kwan@BIG-ROD
Supper Moment 樂器講座
Rock n' Roll係一種好易入腦嘅音樂風格，基本由電結他、bass及爵士鼓組成，搖滾樂以大膽和富有激情的音樂節奏，表達歌曲情感，受到了全世界年輕人的喜愛，所以「夾band」就是變成一班年輕人玩樂、發泄、釋放的一種渠道。正所謂「工欲善其事，必先利其器」，要做一個搖滾教徒，首先要識得同手上嘅樂器溝通，結他嘅高傲、bass嘅沉實、鼓嘅激情，每件樂器都有獨特性格。而作為一個初心者，你第一件選擇嘅樂器非常重要，無論手勢、歌路都會有影響，今次就找來Supper Moment為大家由淺入深地介紹各種樂器，以及自己的夾band心得，搖滾不死、Rock n' Roll never die就要大家延續喇！
電結他
Electronic Guitar電結他喺隊入面點都係最搶眼嘅一位，電結他音域廣，加上effect令整段音樂有不同的層次變化，「我相信好多人一開始夾band都會選擇做結他手，貪有型吖嘛，如果初學者budget又唔多，我會介紹大家用YAMAHA嘅Starter pack，一盒有齊電結他、amp、jet線等基本裝備，好使好用。」阿雞說，當大家玩到咁上下，技術及見識都所進步，支結他就要升級話，好多人都會選擇Ibanez，「因為Ibanez啲結他琴頸比較薄，夠貼線，好適合技巧型嘅結他手用，另外Music man會適合亞洲人手形，成支結他會比較細，scale亦都短啲方便彈奏。而如果你玩嘅咩類型都有，或者出show，個人會喜歡Fender嘅Telecaster，因為結他造工靚之餘，每個音的延音都好順滑，即使要彈出清聲拆聲都好順耳，所以推薦！」當你有一支心水結他後，自然會為它配置「最佳拍檔」amp同effect啦，一個拆到爆嘅amp一定影響到你彈出嚟嘅melody，對此阿雞就話：「amp大致分膽機同原子粒機，同最新嘅digital amp 3種，膽機固然之最好，首選牌子有Marshall、Fender、Mesa Boggie，出番嚟啲聲最原始，出show一定用佢，而原子粒機就價錢平，不過如果開到最大聲，彈清聲都一定會拆，所以啱band房或者屋企用。」阿雞繼續講：「effect就好視乎用家嘅須要喇，多數初學者一開始會用multi effect，因為有成100種效果選擇，比較划算。不過只有1種effect嘅地雷仔其實先最啱用，喺冇得選擇情況下一定要練到最好！」
PRS 25th ME2以Paul Reel Smith命名，靚聲之外琴頸的飛鳥圖案亦吸引。 售價：$43,000
Line6是常用又好用的multi effect之一，售價：$1,900
國際之名的amp品牌MARSHALL，不少大型Show都一定見到它的助陣。XOTIC 的effect最出名，同樣結他的造功亦不俗，XOTIC Hand Made Ash TELE 售價：$34,000
Ibanez的結他適合技巧型結他手，Ibanez ICT700 Iceman Black，售價：待定The Heritage擁有悠久歷史，屬高階級結他，The Heritage 535 Hollow Body，售價：$20,000
Fender的結他功能性強，適合各類型的音樂，售價：待定YAMAHA的Starting pack有齊電結他的基本製裝備，售價：$3,000
木結他 Guitar
木結他喺隊band多數飾演rhythm角色，對音色要求相對高，而木結他嘅知識當然找來Sunny同大家分享啦。「以新手來說我會介紹用YAMAHA嘅出品，音色絕對唔差，普通$1,000以上都得，不過一定唔可以買幾百蚊嘅魚絲結他。而且木結他有一個優點就係彈得愈耐愈開聲，我自己支結他彈咗8年，啲聲清脆過其他新買結他。」初學者在選擇結他時一定會忐忑，不過Sunny嘅tips就係普通$1,000左右的結他已經好夠用，至於點選擇結他呢？Sunny就話：「主要睇造工啦，琴嘅body同頸位連接得好唔好，靚木造嘅結他共鳴會比較大，彈落去琴會有大啲嘅震動，選擇啱自己手感、顏色同眼緣，因為一支你鍾意嘅結他係你玩音樂嘅動力！」
貝斯 Bass
終於輪到band中最所謂「最低調」嘅bass啦，當筆者每次講起首歌啲bass好正時，身邊音樂感較差的朋友總會問甚麼是bass聲，對此S.M.的bass手C.K亦同意說：「好多初學者彈bass時都刻意彈得不太清晰，有啲blur blur地嘅感覺，呢個係一個壞習慣。而我就推介Ibanez嘅GSR series俾大家，第一價錢平，第二唔使換電，而且有齊前後pick up、tone位，加上琴頸比較短，行scale都短啲啦。」玩到咁上下年資都會心思思換支新bass，「我而家常用XOTIC嘅五弦bass，因為多條低音B，節奏變化上會靈活好多，加上用咗2條內藏銅牌嘅木製pick up，可組合出8種聲，而且頸位闊啲slapping都舒服啲啦。」雖然bass喺演奏中的solo不算多，不過沉實和諧嘅聲音令不少結他手轉玩bass，因此amp的選擇亦相當重要，C.K說：「尤其是Ampeg嘅amp，專為bass而設，即使推到最大聲都可以清楚聽到bass的每粒音，呢樣對台上嘅bass手好重要，因為可以聽番自己彈緊咩。」所以話bass呢樣樂器喺每首歌都非常重要。
用上碳纖製作琴頸的ZON Sonus 5弦Bass密度夠高，音色不比木製差，售價：$35,000
鼓 Drum
掌管住成首歌嘅節奏非鼓莫屬，鼓手打得快，結他bass要跟住快，鼓手打得慢，結他bass要跟住慢，所以鼓手要有一個很好的節奏感。S.M.鼓手阿達就話：「鼓手要好好嘅節奏感，所以無論新手或老手都要經常練習，首自要有一支合適嘅鼓棍，我常用嘅鼓棍會係5A，而7A鼓棍就最輕同最幼，打出嚟會輕聲啲，而英文字就代表硬度，會影響手腕回彈力。另外鼓手必備品之一就係練習pad，可以訓練敏捷度、節奏感同速度。」當然要買一套鼓真係話平唔平，阿達說：「TAMA嘅入門鼓係唔錯選擇，不過木製部分密度低，tune鼓都難啲。而一分錢一分貨，貴鼓嘅parts好準，因為人手造，tension夠大，所以afford到可以選擇。之後隨個人須要加double bass drum、唔同嘅tom、crash或者玩味啲嘅cow bell。」一個鼓手嘅好朋友一定係snare，唔同嘅厚薄守寸數嘅pitch同延音都有好大分別，上到台鼓手應該盡量釋放能量吧！
Snare的花紋、顏色最能表現鼓手的特色，DW Collector’s series 14吋Snare，售價：$10,500
透過Trigger，演唱會監製可即場改變鼓聲，算是鼓的effect吧，Linkin Park的演唱會中也經常用到Trigger玩效果。
TAMA的入門drum set 約$4,000，是一個不錯的選擇。
沒有留言:
張貼留言