本地樂隊嘅聲勢愈嚟愈大，愈嚟愈多人支持本地原創音樂，所以今年我哋NM+/《新Monday》構思咗1個暑期習作計劃——「敢作敢拍」。我哋一直覺得band sound不單係個名詞，更代表住流行文化，而流行文化嘅擁有者，正係社會嘅新一代。
「敢作敢拍」計劃嘅理念好簡單，由NM+統籌，分別搵嚟4隊本地樂隊——KillerSoap、KOLOR、Supper Moment同Yellow！，每隊提供1首作品，交由香港知專設計學院（HKDI）嘅學生負責製作MV，由度橋、準備、拍攝到後期製作一手包辦，希望借此令學生吸收拍攝經驗嘅同時， 新一代嘅思維可以同時激發樂隊創意。
多謝4隊樂隊嘅參與，「敢作」出嘗試接受新事物；多謝HKDI學生嘅參與，「敢拍」出自己夢想。
about HKDI...
位於調景嶺嘅香港知專設計學院（HKDI），係香港首間大型設計學院，更迎請法國建築公司Coldefy & Associs耗資12億設計學院（圖）。院方希望將所唔同範疇嘅設計都集中喺HKDI，課程包括室內設計、產品、平面、多媒體、時裝等等，而今次參與計劃嘅學生，就係嚟自多媒體廣告及視覺特效系。
about Supper Moment...
筆者首次聽local band就係聽Supper Moment，佢哋嘅音樂令我覺得音樂唔應該用主流/非主流去界定，目前佢哋錄緊新碟，新歌〈機械人〉亦啱啱派咗上台。
Supper Moment
N：點解會參與「敢作敢拍」計劃？
S： 「我哋經常夾band，都希望可以做番啲嘢，除咗灌輸音樂俾香港外，亦希望能夠教育香港嘅後生。教育嘅意思係，將香港嘅音樂變成1種文化，所以做多啲呢類型project，對香港音樂文化係1件非常正面嘅事。」
N：之前有冇試過同學生合作？
S： 「其實以往一直都有同學生合作，因為我哋大部分嘅演出都係去大學、大專、甚至一啲非牟利機構或青年團體，就算有時做商業演出，好多時主題都係關於年輕人，所以合作機會其實好多。除此之外，我哋同HKDI都算有啲淵源，幾年前同過一班讀廣告系嘅學生合作過project，拍過下嘢。」
N：點睇呢班90後學生？
S： 「我哋對佢哋印象係幾好嘅，因為佢哋嘅準備幾充足，喺故事構思同畫面上嘅掌握都唔錯，因為MV好多時都係冇對白，需要透過畫面表達想講嘅嘢。另外，佢哋畫嘅storyboard好有心機，咁當然，佢哋重有幼嫩嘅地方，但我覺得佢哋唔需要擔心太多，因為喺學習階段，好多嘢真係要經過嘗試先會學識。」
N：對呢個計劃有咩期望？
S： 「〈很久沒擁抱〉呢首歌其實係喺上隻碟中我哋幾鍾意嘅1隻side track，叫佢做side track，係因為首歌冇拍MV，同埋首歌速度比較慢，所以喺live show上比較少玩。希望呢個MV拍咗出嚟之後，會多啲人聽呢首歌。」
N：〈很久沒擁抱〉呢首歌點嚟？
S： 「講1對情侶相處耐咗，到咗所謂嘅樽頸位，好多事情都變得好似係必然，或係種習慣，慢慢就轉化成忽略。」
沒有留言:
張貼留言