睇Supper Moment演唱會，係筆者今年最期待嘅1場表演，沒有之一。
記得第1次聽Supper Moment，係由佢哋首張大碟《再次心跳》聽起，聽住〈點滴〉充滿活力嘅intro、〈Dance In The Rain〉中CK嘅bass slapping，已經深深愛上，整張專輯歌曲編排得好好，由日出嘅〈點滴〉到日落嘅〈Goodnight City〉，以歌曲形容城市百態。Supper Moment重有樣魅力，就係感性，比起賣技術，佢哋更着重歌曲所表達嘅意思，從〈尋回一碗湯〉中，叫人珍惜與家人食飯嘅機會，到努力堅持夢想嘅新歌〈無盡〉，聽完內心不斷共鳴着。
今年4名小伙子，終於踏上九展Star Hall大舞台，獲得3,000名真金白銀買飛支持嘅觀眾，而佢哋對住音樂，面上仍流露着傻勁、快樂。
政治作影像
寫呢篇稿嘅同時，剛得知Supper Moment憑着〈機械人〉奪得CASH金帆音樂獎「最佳樂隊演繹」獎。近幾年呢個獎都係RubberBand與Mr.相爭，今年終於有新境況，攞獎唔再分主流或非主流，就算冇簽大公司，有實力一定有人欣賞，我撐Supper Moment可以再接再厲，喺叱咤頒獎禮再下一城。
講番演唱會當晚，樂迷們好早已經嚟到現場購買紀念品，比起11年「再次心跳演唱會」，今年Supper Moment喺影像上落足工夫，開首以舊香港演變到新香港，繼而到國教風波、免費電視牌照事件等片段，宣示對社會嘅不滿，引起全場起哄，皆因一般演唱會都較少掂政治題材。
不過，筆者留意到Supper Moment好鍾意用人哋嘅歌mix埋自己嘅歌，如前年「再次心跳演唱會」中，就用五月天嘅〈溫柔〉mix〈P.S I Love You〉，今年就係Eason嘅〈最佳損友〉mix〈小伙子〉。
Supper CD你儲齊未都算係樂迷嘅筆者，竟然都未儲齊佢哋嘅碟，真係感覺有啲羞愧。頭2隻EP《等等?》同《旅程》已經斷市，記得有次問Supper，佢哋話自己都冇存貨，所以演唱會其中1份紀念品就係將呢2張EP結合，都只係賣$100，不過筆者遲到買唔到，真係喊咗出嚟。
抓緊夢想
「人生有限，但追求夢想嘅力度，永遠係無盡。」全晚主音Sunny講咗好多關於追尋夢想嘅金句，呢句筆者好想節錄俾大家，因為真係好感動。
由Supper Moment前身樂隊Lunch Box走到今時今日，歌曲〈無盡〉奪得各電台榜首，踏上面對3,000人嘅舞台，呢個成績得來不易。Sunny喺台上講：「今年好多人都睇好我哋攞獎，我哋唔係話唔開心，但我開心嘅係，呢幾年大家都肯去行多步，了解香港樂隊，而且整個香港都有個健康嘅音樂圈子。」〈無盡〉係佢哋用一路以來嘅點滴所寫成嘅歌，少啲經歷都寫唔出，節錄一句歌詞「仍然倔強冒險一一去征討」，係代表Supper Moment做音樂嘅態度，亦代表我哋每個人，都要抓緊我哋嘅夢想，就算幾困難，只要感動過、燦爛過，就並不枉過。
text - Joel photo - Kenny design - fanny
沒有留言:
張貼留言