第1次接觸Supper Moment，緣自去年1位同事帶筆者上band房幫主音Sunny慶祝生日。當時嘅我，對佢哋其實未完全瞭解，印象重係停留喺成名作〈最後晚餐〉，但經過幾次訪問後，發覺呢隊嘢異常「老積」，講嘢、所寫嘅歌都可以令我好有共鳴。今年推出新EP《小伙子出城記》，4子長大咗唔少，無論歌曲，或態度上都更成熟，但樂隊正面嘅態度就依舊保持，而呢個亦係筆者一直鍾意Supper Moment嘅原因。
成長不能片面
新專輯《小伙子出城記》可以講係1張別具一格嘅作品，筆者感受到佢哋將沉澱多年嘅情感放喺歌詞中，尤其〈小伙子〉確實愈聽愈心酸，主音Sunny坦言呢首歌係用咗有史以來最長時間去寫。Sunny話：「〈小伙子〉其實我哋上年已經開始寫，但一直都完成唔到，因為寫1首關於成長嘅歌，係需要沉澱耐少少，否則所有嘅論點都會變得好片面。重記得前排我哋寫完後，都第一時間喺facebook分享自己嘅感受，嗰一刻簡直覺得好似挖空咗自己嘅心臟咁。」好多人聽落呢首歌都會心酸，係因為面對現實同理想，根本冇得你揀，而Supper Moment 4子總算幸運，出道近4年，已經有今日嘅成績，不過，當年嘅Lunchbox樂隊（Supper Moment前身）亦係捱過不少苦而來。
執著非壞事
港台DJ Eric Leung話Supper Moment嘅《小》係佢哋出道以嚟最精緻嘅作品。其實背後佢哋都聽過好多唔同意見，不過4子直言喺呢張碟學到執著2字，鼓手阿達話：「尤其做音樂、做創作，身邊總會有人批你棱角，因為呢樣嘢真係好主觀，但我哋喺〈過後〉呢首歌，搵番一路以嚟嘅嗰份堅持。」4子直言，呢首歌係最反叛、最唔聽人意見，但結果出到嚟一樣咁成功。所講嘅堅持，就係佢哋一直依照自己想法去創作，並唔係市場需要咩，佢哋就寫咩，呢啲先叫做「獨立樂隊」，Sunny話：「好多傳媒都會將唔紅嘅樂隊歸納為『獨立樂隊』，但其實『獨立』嘅定義係講緊獨立思維。」老實講句，大家口中嘅獨立音樂，水準比起好多紅歌手高幾班，而我今年亦係聽「獨立」多過聽「紅」歌。
text - Joel photo - Kenny design - Hin
沒有留言:
張貼留言