暑假完結，學生亦回到校園，由NM+/《新Monday》同本地4支樂隊：KOLOR、KillerSoap、Supper Moment同Yellow!合作嘅「敢作敢拍」暑期作業計劃，亦差唔多去到完結階段。最後出場負責Supper Moment MV嘅呢班就讀多媒體高級文憑學生（現於HKDI/IVE（LWL）就讀），本來團隊得3個人，開始時都擔心佢哋搵唔搵到幫手，但由於聽到係幫Supper Moment拍MV，結果一呼百應。另外喺拍攝前1日仍落住雨，但正式開拍時卻陽光普照，順利完成，為今次計劃畫上完美句號。4個MV已進入後期製作階段，經埋各樂隊最後審批，就會喺《新Monday》fb首播，記住到時要支持各同學同本地band嘅心血結晶。俾多啲like。
誠意有加
Supper Moment，係筆者第1隊接觸嘅本地樂隊，所以計劃一開始，自不然就諗到邀請佢哋參加，因佢哋形象除咗夠親民外，喺學校階層中重好有號召力，所以呢班學生一聽到有機會幫Supper Moment拍MV，自不然落力畫storyboard（圖），出到嚟嘅效果，就連Supper Moment都讚：「出面專幫人拍嘢嗰啲，都冇畫得咁仔細。」雖然班學生拍嘢係少啲經驗，但至少喺份storyboard同埋事先重去埋實地考察，已見到佢哋嘅誠意。
有驚無險
故事講1對情侶嘅同居生活，佢哋每天重複做相同嘅事，慢慢開始感到乏味，關係一日比一日冷淡。要營造屋企氣氛，我哋搵咗位於荃灣嘅傢俬店Retro Modish拍攝，雖然當日天氣麻麻，時晴時雨，拍室內景唔使擔心天氣啫，但學生們就比較擔心整爛傢俬。而準備充足嘅佢哋，拍攝亦非常順利。不過，當拍完室內景，準備到上環拍戶外景時，突然收到天文台發出雷雨警告，大家頓時面色一沉，成班學生要即刻諗plan B。當時佢哋諗過即轉去附近嘅荃灣公園拍，但政府嘅嘢又點會俾你即拍呀？最後決定硬住頭皮博一博，趁未落雨趕過去上環先算，始終嗰邊環境靚，出嚟效果都好啲。幸好，個天都冇「打波先嚟落雨」，終告順利完成拍攝。
學生團隊：The Helen's Crew
今次呢個團隊，本來由2男1女組成，筆者唔係話睇小佢哋，但得3個人肯定搞唔掂。好彩佢哋一開口即有十幾位朋友嚟幫手。學生朱燕文話，第1次真正做導演都幾吃力，「拍攝當日，需要清楚指揮各人嘅工作，要跑嚟跑去睇景，又擔心天氣或其他因素，要處理嘅事情，真係唔係1個人可以完成到。」呢啲就係學校都學唔到嘅寶貴經驗喇。
演員—張嘉珮、陳景鴻／導演—朱燕文／編劇—朱燕文、周子澄／分鏡插畫—周子澄／攝影—高江淩、陳煒珅（助理）／燈光—彭展鏗、黃家富（助理）／美術—鍾卓華、陳凱穎（助理）／場記—羅嘉倩／製片—-方惠儀、羅嘉倩／後期剪片—陳凱穎、周子澄、陳孔悅
text - Joel ／photo - Joel、Kenny／location - Retro Modish ／design - nam
沒有留言:
張貼留言